عادات سيئة للشعر لابد من التوقف منها
 

عشان اهتم بأى حاجة متعلقة بشعر وبشرة او غيره، اول حاجة لازم اعرفها هى ان اكلى بيأثر على جسمى وكل ما هاكل اكل صحى كل ما ده هيأثر بنتيجة ايجابية على بشرتى وشعرى. تانى حاجة لازم اعرفها هى اهمية النوم المريح والكافى وفى مواعيده المضبوطة واول نصيحة تلاقيها من خبراء التجميل هى اهمية النوم..

http://3.bp.blogspot.com/-78fL-yCl4t...84%D8%B7+!.jpg


نيجي بقى للعادات الغلط اللى بنعملها ومبنخدش بالنا منها او حجات مفروض نعملها وبرضو مبنخدش بالنا منها..

غسيل الشعر بالشامبو كثير، فيه ناس بتاخد الشاور ممكن اكثر من مرة فى اليوم مش بس مرة كل يوم وبتستخدم الشامبو فى كل مرة وده غلط لأن كثرة الشامبو بينشف الشعر وبيبوظه وبيطلع كل الزيوت الطبيعية الموجودة فيه والأحسن يبقى مرة كل يومين.

وانا بختار الشامبو بتاعى ابعد عن اللى فيه مكونات من الكبريتات او البارابين، الكبريتات هى المادة الكيميائية اللى بتعمل الرغوة الكثيرة فى الشامبو والبرابين هى مواد حافظة ودى اللى بتسبب فى الحرقان اللى بيجى فى العين من الشامبو.

وأختار شامبو مناسب لنوع الشعر سواء كان مجعد او دهنى او مصبوغ او جاف وجربى لحد ما تلاقى شامبو فعلا جاب نتيجة معاكى.

توزيع الشامبو فى فروة الرأس باطراف صوابعى وبحركات دائرية مش بالضوافر ومش بسرعة عشان كل ده بيأثر على فروة الراس.

غسل الشعر بالماء السخن ودى أكبر غلطة ممكن بتتعمل، الماء السخن بينشف فروة الرأس، فاغسل شعرى بالماء الفاتر الدافى ومسبش اى بواقى شامبو على الشعر عشان مينشفش الشعر او يجذب التراب.

استخدم بلسم مرطب للشعر، فى كل مرة بستخدم فيها الشامبو عشان هيرطبه ويديله حماية ولمعان ويقلل من اى تشابك بيحصل للشعر بسبب البلل.

اسيب الشعر ينشف طبيعى، ودى حاجة مش ناس كثير بتعملها بس هو الصح والأصح انى بدل ما استخدم فوطة ممكن انشفه بحاجة مصنوعة من القطن على اساس تبقى انعم على الشعر ومتشدهوش جامد وتأصفيه، ولو هستخدم فوطة وانشف بيها يبقى التنشيف من الجنبين وبحركات دائرية بطيئة شوية بدل الحركات السريعة العنيفة وهتلاقى الفرق فى الحركة دى بس وتأثيرها على تساقط الشعر.

ولو هنشف بالسشوار اضبطه على ابرد درجة لأن اصلا الحرارة على الشعر غلط خصوصا وهو مبلول اوى كده بعد الشاور ومعرضهوش لنفس المنطقة اكثر من كام ثانية، اخليه من على بعد كويس وافضل احركه دايما على مختلف اجزاء الشعر. وتنشيف بالسشوار يا ريت ميزيدش عن مرة فى الأسبوع.

تسريح الشعر وهو مبلول، عن اعتقاد البعض ان ده الأصح وهو العكس تماما. الشعر وهو مبلول بيبقى ضعيف وسهل الوقوع وسهل الشد والتقصيف عشان كده مينفعش اسرحه ولو هسرحه عشان امنع التشابك استخدم مشط ليه سنان واسعة وش مش جامدة اوى عشان مجرحش فروة الرأس.

مسرحش الشعر زيادة عن اللزوم حتى وهو ناشف !على قد ما تسريح الشعر مفيد لتحفيز فروة الرأس وبالتالى بيساعد على نموه الا ان كثرته هتنتهى فى تجعيده وتقصيفه.

تسريح الشعر من تحت لفوق، اكيد اخدنا بالنا ان دايما التشابك فى الشعر بيبقى من تحت عن فوق، فا امسك الأطراف اسلكها الأول واسلكه من تحت تدريجيا لحد فوق.

تنظيف الفرشة والمشط، على الأقل اسبوعيا بإستخدام شامبو او صابون.

احاول ابعد عن الفرش والأمشاط البلاستيك، عشان بتسبب الكهرباء الساكنة غير انها بتبقى جامدة على الشعر وفروة الرأس.

http://3.bp.blogspot.com/--gpEHDSbeM...4%D8%B7+!-.jpg


نصائح عامة

لو هحط منتجات على شعرى زى الهير سبراى مثلا احاول ابعد عن اللى فيها كحول لأنه بينشف الشعر، ومحطهوش مباشرة على فروة الرأس عشان مسدش المسامات.

اقص أطراف الشعر كل شهرين او شهرين ونص، مش عشان يطول أكثر لأن دى خرافة اصلا وهنتكلم عنها بعدين لكن عشان اخلص النهايات المقصفة لو شفتى اى بنت شعرها حلو مش هتلاقى فيه النهايات المقصفة لأنها اكيد بتقصها دايما.

لو بصبغ يبقى مش على طول، صبغ الشعر من أكثر الحجات اللى بتأثر على الشعر سلبيا وبالتالى محتاج عناية مضاعفة فا ادى لشعرك استراحة ما بين كل صبغة والتانية.

قلت قبل كده ان الحرارة اصلا غلط على الشعر مع ذلك كثير مننا بيستخدمها على طول ومتعرفش ان بكده بتبوظ شعرها يوميا، لو خارجة يوم او عندك مناسبة تمام بس على طول هتخلى شكله اوحش بالتدريج !

لو محجبة فى الغالب بتضطرى تربطى شعرك بتوك، حاولى متشديش شعرك جامد بيها عشان مساعدش على تقصيفه واحاول على قد ما اقدلا فى البيت اريح شعرى من الربط بالتوك.

حاولى تبعدى عن التسريحات اللى فيها شد جامد للشعر خصوصا لو هعملها بشكل متكرر.


لو هتنزلى حمام السباحة مثلا، بللى شعرك الأول بالماء العادى عشان الشعر يمتصه بدل ما يمتص المياه المعالجة بالكلور.

اخر نصيحة، الضغوط والارهاق المستمر بيأثر على الجسم كله وأكيد بيأثر على الشعر وتساقطه والضغوط مش بتبقى بايدينا بس اقدر انفسها من خلال الرياضة مثلا او التمشية او التأمل وغيره