صالون اطفال للتمليس

04-05-2011, 09:00 AM

مرحبا بنات

شلــــــــــــــــــــــونكم ،،،

حبيت اقولكم تجربتي امس مع بنتي

بنتي عمرها 4 سنوات شعرها ناشف وخشن وتكسر الخاطر حاولت وايد وضيعت فلوس وايد على خلطات وكريمات وطبعا يستفيد شعرها بس يوم ويومين ويرجع مثل ما كان

قررت اني اسويلها كيراتين بس خفت عليها من صالونات الحريم يحرقونها ولا يعورونها معوروفين بالدفاشه اذا احنا يحرقونه ويعورنه شلون الياهل واكيد مافيهم صبر عليها.

وفتحت الانترنت ودشيت على منتداي المفضل كويتيات ولقيت موضوع قديم كاتبين فيه عن صالون اطفال يسوي كيراتين وتمليس وطبعا خذيت بنتي وركضت عالصالون ولقيت اللي يشتغلون قاعدين ماعندهم احد خفت بالبدايه وقلت شهالصالون اللي مافي ولا زبون وبعدين قلت لهم اني ابي تمليس طبعا قالي بحط لها تمليس نسبة قليله مع كيراتين اكثر علشان انها صغيرة وقال بضبط الاطراف قلت له ماشي بس بجم قال لي 50 دينار قلت له وايد قال هذا اخر شي ومافي مجال طبعا انا ابي الفكة واخلص قلت له ماشي توكل على الله .

غسل شعرها ونشفه وحط لها الخلطة وعجبني ان كان حريص ان الخلطة ما تحوش فروة الراس وكان صبور عليها ويسولف معاها ويلعب معاها .

وفجأة لقيت الزباين واحد ورا الثاني يدشون سبحان الله كنت اتحلطم ما عندهم احد واحد داخل وواحد طالع واهوه اللي استلم بنتي ما اهملها بالعكس كان يشوف شعرها اذا صار اوكي ولا لا ويرجع يكمل شغله مع الزباين.

وبعد تقريبا 45 دقيقة غسل شعرها وحط لها كريم 5 دقايق وغسله وقص لها الاطراف والقذله ونشفه لها وصار يهبل اشحلاته ولا كأنها حاطه شي على شعرها مو مثل الكيراتين اللي بالصالونات يصير الشعر مدهن وملزق.

وكان الشعر روعة وامبين فيه حيوية .قال ان نفس طريقة الكيراتين ما اغسله الا بعد ثلاث ايام.وبعد ثلاث ايام بغسله واقولكم شنو صار معاي.

الصالون اهوه ديزني لاند الجابرية

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
صور اطفال كيووت للمسن	فلاويه	صور مسنجر	0	03-29-2011 01:13 AM
حليب اطفال؟؟؟؟؟؟؟؟؟؟؟؟؟؟؟؟؟؟	انمي	حصري	0	03-24-2011 06:40 PM
حليب اطفال؟؟؟؟؟؟؟؟؟؟؟؟؟؟؟؟؟؟	انمي	حصري	0	03-24-2011 06:40 PM
العاب اطفال الهند ...!!!	الحزينة	مملكة الصور الغريبة و العجيب	6	07-27-2009 02:41 AM
نكت اطفال	قلب الانتر	مملكة الضحك و التسلية	11	07-13-2009 02:45 AM

اعلاناتي

صالون اطفال للتمليس

حصري

للمزيد من مواضيعي