سمج الميد المشوي اللذيذ مع العيش المشخول والمرقه الناطعه..حياكم الله

04-05-2011, 11:00 AM

**سمج الميد المشوي اللذيذ مع العيش المشخول والمرقه الناطعه..حياكم الله**

(السلام عليكم ورحمة الله وبركاته)

((الحمدلله الذي اطعمني هذا الطعام ورزقنيه من غير حول مني ولا قوة))

اشلونكم خوااتي الغاليات
عساكم بخير وعافيه،،،

نبتدي:

سمك ميد منظف ومغسل ..نفركه بشوية طحين وملح ونخليه لمدة نص ساعه فيه... وبعدين نغسله وانشفه عدل عن الماي.
وهذا سمجناا

نجهز خلطتنا اللي نبي نغلف السمك فيها:
عبارة عن( نص كيس تمر هندي(صبار) تنقعينه بشوية ماي وتاخذين خلاصته بالمشخال الصغير.
ثلاث ملاعق اكل معجون طماط
4ملاعق اكل زيت
تمر منزوع النوا نهرسه بايدينا مع تخفيفه بالماي والكميه حسب رغبتج( انا هرست حوالي 12 تمره..تمر مو رطب).
ملعقة اكل كركم
ملعقة اكل بهار مشكل
مكعب ماجي
ملعقتين اكل فلفل اسود
ملعقة اكل كمون
ملعقة اكل كزبرة مطحونه
ملعقة كاتشاب
ملح حسب رغبتج وتذوقج للصلصه
نخلطهم عدل ونحطها على السمك ونفركه فيها من داخل وبره، و نحطهم بصينيه ندخلها بالثلاجه قبلها بيوم او من الصبح عشان يتشرب السمج النكهه.

وهاذي الخلطه

ومن باجر نطلع السمج من الصينيه الي كان فيها بالثلاجه .
ونحشي بطن الميد بحشوتنا المكونه من (نص شدة كزبره +نص شدة اشبنت+ملعقة كركم+ملعقة فلفل اسود + زنجبيل مدقوق+ ملح)
هاذي الحشوة

.وننقله الى صينية او صاج الفرن( انا سويته بصاج الفرن عقب ما حطيت عليه قصدير ومسحته بالزيت).
وضروري اتخلصين من الماي مال التتبيله اللي تشوفينه زايد بالسمج..وتصفينه بالصاج مع دهنه بفرشاة بالزيت على وجه السمج وتشغلين عليه الفرن من فوق وتحت..وتراقبينه لا حسيتي انه تحمر وتحمش من فوق تقلبينه على الصوب الثاني ليما يكتمل التحمير والتحمش ..وكل ماعطيتيه مسحة بالفرشاة احسن عشان لا ييبس معاج.

وهذاا السمج منسدح بالصينيه

وخلطتنا عليه

وسويت عويشه مشخووله ...لذيييذه... طريقتها:
عيش تنقعينه بماي دافي مدة ساعه وعقب تغسلينه وتسلقينه بماي وملح وشوية زيت ثلاثة ارباع استوا وعقب تشخلينه وتخلينه على كتر.
وبجدر نحط زيت كميه زينه ونحمس فيها بصل كميه وفيره مقطع حلقات ونضيف عليه نص ملعقة كركم ونص ملعقة بهارات مشكله ونص ملعقة فلفل اسود ونحمس ليما تشوفينه بدا يتشوقر ضيفي عليه العيش المسلوق وسكري جدرج عدل وحطي على وجه العيش شوية زبدة .

وهذاا عيشناا يوم قلبناااه.. :rerrerek:جنه كيكه تنطر القص

خلصنا من العيش نجي للمرقه الناااطعه،،،

وطريقتها:

نحمس بصل مقصص صغار بزيت وفير ولا تشوقر نضيف ثوم كميه زينه وزنجبيل مدقوق ونحمس عدل ونضيف بمقدار نص ملعقة اكل بهاراتنا المشكله والكمون والكزبره المطحونه والكركم والفلفل الاسود ونتفة لومي يابس وشوية هيل مطحون ونحرك عدل ونضيف نص علبة معجون ونحمس ليما تمتزج المكونات على نار هاديه وعقب نضيف نص شدة كزبرة خضرا ونص شدة اشبنت
ونحمس ونضيف على حمستنا ماي حار نكون مجهزينه يغطيها بحوالي 2 سم ونسقط ثلاث حبات لومي اسود ونسقط جم سمجه ميد في المرقه ونخليها تستوي حوالي 20 دقيقه على نار هاديه.
وهاذي المرقه:

وهذاا طبقناا بشكله النهااائي:

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
////حياكم الله ////	انمي	حصري	0	03-28-2011 09:58 AM
خصومات على كل الأسعار والتنكري حياكم الله	انمي	حصري	0	03-28-2011 03:56 AM
خصومات على كل الأسعار والتنكري حياكم الله	انمي	حصري	0	03-27-2011 03:05 AM
خصومات على كل الأسعار والتنكري حياكم الله	انمي	حصري	0	03-27-2011 03:05 AM
الرجل الأسود في البيت الأبيض !!! الشيخ عائض القــرني	عـــادل الشـــمري	المملكة العــــامة	8	12-04-2008 04:31 AM

اعلاناتي

**سمج الميد المشوي اللذيذ مع العيش المشخول والمرقه الناطعه..حياكم الله**

حصري

للمزيد من مواضيعي

سمج الميد المشوي اللذيذ مع العيش المشخول والمرقه الناطعه..حياكم الله