2013جديد لمن تبحث عن معلومات عن اوربا

07-27-2013, 07:22 AM

السلام عليكم
شلونكم خواتي
انا حالي حال اكثر الكويتيات اللي التهيت بالانستغرام ولما جاء وقت السفر رديت لمنتداي الحبيب لكن للاسف مالقيت الا بعض المواضيع الجديدة والباقي كله قديم.
انا ما اعرف انزل صور ولذلك موضوعي للاسف بدون صور.
انا سافرت مرتين اوربا مرة ميونيخ والنمسا وكان من زمان سنه 2006.
ب2011 سافرت لميونيخ وقعدت فيها ليلتين وانترلاكن خمس ليالي وستراسبورغ اربع ليالي ودسلدروف اربع ليالي وفرانكفورت ليله .
هني راح اتكلم عن سفرتي الثانيه باختصار واهم المعلومات اللي اعتقد انكم تحتاجونها.
اولا كانت السفرة عالقطريه اللي صراحه ماعجبتني كثر الاماراتيه لكن لا باس فيها وكنا اربع اشخاص انا وزوجي وبنتي وولدي.
الفنادق كانت كالتالي
ايدن بميونيخ
شقق شويزي بمنطقه خارج انترلاكن والله نسيت اسمها
وايديغو بستراسبوؤغ
ميركور بدسلدروف
الهيلتون بفرانكفورت

السيارة كانت من ايوروكار وكانت سيارة تكفي اربع اشخاص ولكن ماكفت كل جناطنا لانهم كثار وحشرناهم بالغصب. كلفتنا السيارة 350 دينار ل14 يوم.

اهم نقطه فادتني ان زوجي كان يروح للسفريات اللي متعامل معاها ويحدد له الموظف الفنادق الزينه بالمناطق وارد بالبيت ادخل على بوكينج واتأكد من موقعها بنفسي واتأكد من حجم الغرفه واذا سعر المكتب احسن او بوكينج. السبب انه المكتب نصحنا بفندق وطلع تقييمه في بومنج 7.8 والثاني غير مكييف وكل شوي زوجي راجع له ومغير الفنادق لكن للامانه الموظف نصحنا بفندق ايدن اللي كان احسن من رائع ورخيص وبالشارع المقابل لشارع المريديان وقريب من المارينا ستراس وعطانا ليله الهلتون ب 45 وهي في بوكينج ب 70.

اما اديغو فكان اختياري انا و شويزي ايضا اختياري انا لكن الغلط اللي وقعت فيه هو اننا اخذنا شقه بالدور الارضي وطبعا بما انني متحجبه فما كنت اقدر افتح الشبابيك واقعد بالشقه بدون حجاب وهذا الشي ضايقني. مع ان شقق شويزي من الشق الحلوة واللي سعرها مناسب جدا.

الغلطه الثانيه هي ان فندق اديغو كان بستي سنتر ستراسبورغ وهي منطقه ما تدخلها السيارات ولازم نصفط سيارتنا بمصافط بعيده شوي ونجر جناطنا.

الاشياء اللي فادتني اني بحثت عن محلات الغسيل الذاتي لان الملابس بسرعه تتوصخ وصعب تنشف بجوهم البارد وللاسف مالقيت الا في فندق في انترلاكن و بالصدفه لقيت غرفة غسيل في فندق اديغو.

الاشياء اللي فادتني اني اخذت ملابس عيالي اللي كنت مستهلكتهم خلال الصيف وملابس الربيع اللي ما ابيهم وقطيت اكثرهم اثناء السفر. وكنت ماخذه ملابس داخليه بزياده عزكم الله لعيالي طبعا.
ورحت لكبيبة عيالي اللي دايما تعالجهم وطلبت منها 2 مضاد حيوي وتكتب لي الجرعه لكل واحد ودواء للاسهال عزكم الله ودواء للترجيع عزكم الله والجرعة ودوا للبلغم واخذت كريم الشد العضلي وادول للاطفال. يعني ماقصرت بالادويه.
واغلب الاغراض اللي اخذتهم من فرش اسنان ودلاغات وملابس داخليه مارجعت فيهم منها وفرت وزن ولاني مجهزة بالكويت البديل قبل لا اسافر.

من الغلطات اللي سويتها اني اخذت دراجه لولدي من سنتر بوينت كانت اعتقد ب 9 دنانير ولكن ما اكتشفت ان مافيها سله من تحت الا بالمانيا وطبعا انتي محتاجه السله عشان تحطين فيها الاغراض.

الحين راح اتكلم عن السفرة.
طرنا من الكويت الفجر وطبينا مطار الدوحه اللي كانوا يجددونه وكان المطار فيه واي فاي وفيه العاب للاطفال واستأنسوا عيالي حيل بس المطعم اللي بالمطار كان اقل من عادي.
ركبنا الطيارة وتوجهنا لميونيخ ولما طبينا ماواجهتنا مشاكل بس قالوا ليش الفيزا من اسبانيا قلنا لاننا مخططين نروح هناك. طبعا لا مخططين ولا شي.
توجهنا للفندق وسويت لعيالي اندومي اللي يجي بعلب وتصبين معاه ماي مع اني من مقاطعين الاندومي بس كانوا حيل تعبانين حبايبي.
وكان لي الحين فيه وقت ونزلت للسوق وخميت من C&A كأن مافي سوق بالكويت. ورديت للفندق تعشينا ونمنا ثاني يوم على طول للسوق وهم شريت من C&A وكان عندهم خدمه اللي يشتري بمبلغ معين يوصلون اغراضه للفندق كلش مو قصدهم الخليجيين:eh_s(11):
وراح زوجي دور مكتب يوروكار عشان ثاني يوم يستلمها.
ثاني يوم استلم السيارة وشلنا شلايلنا وتوجهنا لستراسبورغ وبالطرق كان فيه مدينه العاب ليغولاند اللي مخططين نزورها. نزلنا ولعبنا فيها وكان عندهم لعبه البحث عن الذهب او غولد فيفر كانت عجيبه نفس البراميل بس بالعرض مو بالطول وفيها رمل ويصب فيها ماي بارد وتدورين فيها قطع ذهب صغار وعقب ماتجمعين أي كميه يعطونك ميدايه وينادون على اسمك ان فلانه حصلت اعلى كميه من الذهب والطفل يستانس طبعا. وكان فيه رسم عالوجوه رائع وشغلات حلوة وبانين اغلب معالم الدول مثل برج بيزا المائل وبرج ايفل وغيرها من التركيب.
كان يوم مشمس بس عجيب والجهال استأنسوا حيل.
بعدها عن طريق القارمن توجهنا لستراسيورغ لكن بدعت فينا الست هانم بتاعت القارمن وتالي اكتشفنا ان السبب مو فيها السبب ان لايمكن الوصول للفندق بالسيارة. وقفنا واحد فرنسي طلع مغربي وقال الحقوني وودانا لمكان قريب من الفندق وقال اصفطوا السيارة بمصافط تحت الارض وروحوا للفندق وهذا اللي حصل.
طبعا استقبلونا بأحلى اسقبال وصعدنا للسويت اللي كان المفاجأة.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
خبيرات اوربا شهر 10 وبالاخص عيد الاضحى	انمي	حصري	0	07-02-2013 05:01 AM
خدمة البي بي والوتس اب في اوربا:)	انمي	حصري	0	05-14-2013 02:01 PM
هل تبحث عن خادمه ؟ هل تبحث عن سائق ؟ المميز للعماله المنزليه هو الحل	ساعه	اسواق ستي	0	08-16-2012 04:40 PM
لحف 2013جديد	ساعه	اسواق ستي	0	03-04-2012 03:41 PM
لحف 2013جديد	ساعه	اسواق ستي	0	03-04-2012 03:41 PM

اعلاناتي

2013جديد لمن تبحث عن معلومات عن اوربا

حصري

للمزيد من مواضيعي