تحطمت حياتي والموت اقربلي ..دخلو للضرورة

02-20-2014, 02:57 AM

بداية حابة اقول انه سالفتي هيه نصيحة للبنات وتذكرة للكل

انا وصلت بحياتي لطريق مسدود ماله اي حل بالدنيا ،،

انا فالمراهقة حبيت واحد حب كبييير واهوا بصراحة عشقني حيل
هالشي كان مخليني طايرة عايشة بالسما لنه محسسني اني انا زوجته وهو ريلي كل وقته كان عندي وكل وقتي معاه ،، بصراحة حبينا بعض حب صادق وصافي وكان مخلص معاي ووافي بكل شي ،،عرفني على اهله ىامه وخته وابوه وكنت اكلمهم ودايم يقولون ان شاءالله يشتغل ونشوفج عندنا بالبيت

اهتمامه وحبه لي خلاني ماشوف ريال غيره بالدنيا واشوفه هو بس ريلي وابو عيالي،،عرفته ونا صغيرة وكبرنا وشبينا مع بعض ..كانت فكرة انه اهوا ريلي مسيطرة على مخي ،، لين بديت اطلع معاه يشوفني واشوفه بس وشوي وشوي لين تقربنا حيل من بعض ..اشتغل وكون نفسه ويا خطبني ونفذ وعده لي

لكن الصدمة شنو؟؟

رفض اهلي بسبب اسباب قبلية وكان رفضهم تااام حاولت مية مرة امي خواني خواتي حريمهم ابد مو راظين لحد ما بدو يشكون ويقولون انتي شعندج مصرة على هاذا ؟؟رفضتي عيال القبايل والحمايل وتتحججين بدارستج ،، وهذا موافقة ومصرة وتبجين تبينه ،،انتي ماتستحين شنو'..طبعن ماقدر اصارحهم لانهم بدو عيال صحرا والله ان درو باي شي ليذبحوني وياكلون لحمي عادي،،الله يسامحهم دنيا واخرة

المهم زاد ظيقي وعشنا انا وفلان باحوال نفسية تعيسة ومن اخيس ما يكون..بديت انتهز اي فرصة اطلع فيها اروح الجامعة واطلع عنده ،،كانت فكرة هاذا ريلي حلالي هذا ريلي ربي اختاره لي عادي كل شي معاه..لين ماصار اللي صار وغلطت غلطة حياتي وفقدت عذريتي مادري شنو كنت احس شلون افكر ،، بس حبه لي وعشقه لي خلاني مينونة ،، من بعدها خطبني اكثر عن مرة واهلي مصرين كل الرفض

ونا مستغربة ليش اهلي جي يسوون ليش هالرفض القاطع واهم حته مايعرفون هالناس ولا سمعو فيهم بس جذي قالو لا عشان اسباب تافهة ومن شافوني مصرة زاد رفضهم''

مع مرور السنين واحنا نحاول بكل محاولة تخطر عبالكم عشان نقرب هاللعايلتين ماشي فايدة ..صحت انهرت عشت حالة نفسية تعيسة فكرت بالانتحار لا ليلي ليل ولا نهاري نهار ..شلون بعد كل هالسنين بعد ما سميت عيالي معاه بعد ما رتبت كل حياتي بكل تفاصيلها معاه بسهولة ينهدم الحلم

قال تعالى
-ومن اعرض عن ذكري فان له معيشة ضنكا- صدق الله العظيم

هاذا اهو السبب بديت حياتي بالحرام وعشت بتفاصيلها وربي ساتر علي لكنه يمهل ولا يهمل..شلون رب العالمين بيوفقني ونا عشت كل شي معاه شلون بيوفقني..انا ماصنت نفسي مثل الطاهرات العفيفات الللي يستحقن انهن يتزوجن ..دمرت نفسي بيدي تحت اسم الحب والعشق الحرام ..

من بعد كل هالسنين اكتشفت انه هالعايلة غير الاشيا القبلية اللي اهلي مايبونها انه فيهم عرق خوال من جهة ابوه وهالشي هلي مايدرون عنه ولا جان مو بس صكو السالفة الا كسرو راسي ..وهالشي كفيل بانه هلي مو يتبرون مني لا يذبحوني لو خذته لانه يعتبرونه عار عليهم مثل الشرف بنسب القبيله،،وهالشي كان كفيل بتحطيمي من بعد سبع سنين ونص عشرة عمر ،،خلاص كل شي انتها،،فقدت عذريتي واهلي مايدرون

وزواج ربي حرمني منه..مابي اوصفلكم اي حال انا فيه لني احس بالموت اقرب لي من اي شي ..الحمدلله اصلي واصوم واقرا وواحمد ربي ستر علي..لكن تحطمت حياتي كلها ومافي اي امل لشي

مابغيت الا اني اقولكم شي واحد

اللي تبدا بشي حرام شنو ما كان لكن انها تدري انه حرام وما يرظي ربنا،،لاتظن بيوم انها بتصححه او بتتوفق فيه،،اتركو كل حرام تسوونه عشان ربي يعوضكم باللي احسن منه ،،وحطو فبالكم انه الدنيا مش بكيفنا ولا هيه دار نعيم نلاقي فيه كل نبيه ونتمناه حت لو اقل شي بنظرنا،، اتركوه وارظو بس (بالصحة والعافية)

خواتي اخر كلامي لكم تذكروه
ما انخلقنا بهالدنيا عشان نحقق طموحات واهداف ونستانس ،،احنا انخلقنا لجل غاية وحدة بس (وما خلقت الجن والانس الا ليعبدون) عبادة ربنا والتذكير فيه والصدقات الجارية اللي تبقا بعد مماتنا..القناعة. بترك كل شيء لجل رب العالمين نعمه لازم كل وحدة تستشعرها عشان تحس بطعم هالدنيا ..عشان تتوفق وهي بداخلها تعلم انه كل شي بيد الله هو يغيرها وبسس لا بيد فلان ولاعلان ،،،
تقربي من الله بالنوافل ..اقري كتب الصالحين ترى فيها قصص عجيبة جد ..تصدقي بكل يوم سوا بابتسامه لو برسالة او بتذكير او بشي تسوينه لهلج او تساعدين الخدامه او تنمعين نفسج من سماع اغنية او فتنة علا فلانة كوني دايم محضر خير وتركي للناس ستين عذر لاخخطائهم ..تاكدي اي شي تسوينه ونيتج لله يعتبرلج صدقة...

ادعولي ربي يرحمني برحمته ويتوب علي ويتقبل توبتي..صح حياتي انتهت وتدمرت لكن مارجو غير رحمة ربي بي وتكون موتتي بخاتمة طيبة

اتمنا تنشرون هاللي صار معاي عل وعسا تذكرة للناس الباقين

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
أعياد النصارى والموت : الشيخ زيد البحري	انمي	حصري	0	12-29-2013 03:58 PM
ايفون نوت .. ب 5 ريال فقط واللي بيطلب اكثر من 5 التوصيل مجاااني	ساعه	اسواق ستي	0	10-09-2012 01:33 AM
ابوي بين الحياة والموت من يدبرله سرير	ساعه	اسواق ستي	0	01-20-2012 05:53 PM
قطوت رفيجتي بين الحياة والموت	انمي	حصري	0	05-01-2011 02:50 AM
لا ياهلي لامت والموت مضمون	لا تحرق قلبي بصدك	مملكة همس القوافي	1	09-19-2008 11:19 AM

اعلاناتي

تحطمت حياتي والموت اقربلي ..دخلو للضرورة

حصري

للمزيد من مواضيعي