البوتى تريننج بقى سهل لاى ام

02-08-2019, 03:02 AM

البوتي تريننج، البُعبُع اللي بتخوف الأمهات بيه بعض، باعتباره أحد أكبر الوحوش اللي بيقابلوها في الرحلة. والتخويف منه بيبدأ من أول ما الواحدة تبقى أُم، تحت بَند إنتي لسه شوفتي حاجة؟ أومال لما توصلي للبوتي تريننج هتعملي إيه؟!

ولأني من الأمهات اللي اتعرَّضوا للنوع ده من الترهيب، كنت شايلة هَمُه جدًا ورافعةً شعار "مش هتيجي، مش هروح". لكن مُجبَر أخاك لا بَطل، وصلنا لفقرة البوتي واللي حصل حصل، وصلتلها وأنا عارفة إن ده وقتها الصحيح، مش عشان كل الناس لازم تبدأ من سن مُعينة.
لأن خليني أقولك أيًا كان السن اللي هتبدأي فيه هتلاقي ناس كتيييييييييييييير شايفين أنه متأخر، وهتسمعي كلام من عينة "ما بنت خالتك علّمت ابنها وهو 6 شهور" و"حماتك علمت جوزك أول ما تَم 40 يوم... إلخ.

1- تجربتك هتفرض نفسها، ومهما كانت الموروثات مفيش حاجة اسمها لازم ومفروض والوقت الضايع.
تجربتي مع البوتي تريننج -ولله الحمد- من أسهل المراحل اللي خوضتها في الأمومة، صحيح إحنا لسه في "الفينيشينج"، بس من كُتر حماسي وانبهاري قولت لازم أشارككم التجربة.

2- متبدأيش إلا لوطفلك مُستعد
إزاي تعرفي إن الطفل عنده استعداد؟
- يُفَضَّل إنه يكون بدأ يتكلم عشان يعرف يعبَّر، فيقدر يقولك لما يحب يدخل التواليت، لأن الاعتماد على حَدسك لوحده شيء مُرهِق ومُحبِط.
- هتلاقيه بيديكي إشارات إنه مُستعد، والإشارات هتزيد بالتدريج.
على سبيل المثال:
بنتي من سن سنتين بدأت أول ما تعمل "نمبر 2" تيجي تقولي، وتجيبلي البامبرز وتيديهونى عشان أغيرلها. بعد مُدة بدأت أول ما تحس إنها هتعمل تيجي تقولي إنها هتعمل أهو، وتروح عاملة عادي ونغيَّر برضو. المرحلة دي تزامن معاها إننا بقينا لو خرجنا وعملت حاجة في البامبرز ومغيرناش (سواء نمبر 1 أو 2) تضايق وتفضل تشد فيه.
وهنا بدأت الخطوة السحرية واللي سَهِّلت عليّ الدنيا، وهي إني بدأت أقعد بنتي ع التواليت مع البامبرز، بمعنى كل كام ساعة أقعدها على التواليت وأحفّزها تعمل، مرة في مرة فِهمِت، ولأنها مُستعدة حبيت الموضوع وبقيت حتى لو مش مزنوقة بتحاول تعمل أي حاجة طالما قعدت.

3- لو هتودي طفلك حضانة، اختاريها بتعلِّم البوتي تريننج، عشان متهديش كل اللي بتبنيه في البيت.

4- لو الحضانة مُلتزمة بالبوتي تريننج متضيعيش مجهودهم وتقولي خَلِّي الطفل يتعلم هناك الأول، وبعدين أبقى أقلعه البامبرز في البيت.. متستسهليش.
قعدنا في مرحلة التواليت/ البامبرز شهر، وأول ما الجو استقر قلعنا البامبرز وبدأنا المعركة،كنت زي اللي داخلين حرب، واستعديت نفسيًا وماديًا.
نفسيًا: اكتأبت مُقدّمًا، وفَهِّمت جوزي إننا داخلين مرحلة عصيبة فميستفزنيش عشان هبقى مش ناقصة، وأي سلوك عنيف مني يكون ريلاكس قُدامه لأن اللي فيّ هيكَّفيني.
ماديًا: اشتريت حاجات مُعينة بناءً على النصايح اللي سمعتها:
- مشمَّعات، تتفرش ع السراير والأنتريهات حفاظًا عليهم من البلل والذي منه. وممكن يتفرشوا على الأرض باعتبار إنك المفروض تشيلي السجاجيد وكده.
في تجربتي مستعملتش المشمعات، بل والأنقح إني مشيلتش غير سجاد أوضة نوم بنتي، ولما لقيت الموضوع مش بهذا القدر من السوء رجعتهم تاني عادي.
- أندرات/ بانتيهات من النوعية المبطنة بطبقتين قُطن وبينهم طبقة مشمَّع، عشان لما الطفل يسَرَّب ميبهدلش نفسه، أولاً عشان ميبردش وثانيًا عشان ميوسخش هدومه كل شوية.
دول مُفيدين، لكن لأني ملقيتهمش فاشتريتهم من على النت، على ما وصلولي كانت بنتي بقت نادرًا لما تعمل على نفسها، إنما أكيد لو كانوا عندي من الأول كان الموضوع بقى ألطف وأقل زروطة.
- أندرات/ بانتيهات قُطن -كبرنا وبقينا نشتري ملابس داخلية للمقاريض الصُغيرين- اشتريت دَستة عشان في الأول بتبقى الخساير كتير، فبدل ما تستني الهدوم لحد ما تنشف يبقى عندك البدايل جاهزة.
- بنطلونات قُطن للبيت، وبنتاكورات قُطن للخروج (خصوصًا لو طفلك بيروح حضانة أو بيخرج بشكل يومي) الجينز مش عملي في الموضوع ده، ويُفضَّل تكون حاجات سعرها معقول، أولاً لأنك هتشتري كمية، وثانيًا لأنهم هيُستَهلَكوا من كُتر الغسيل فمتبقيش رميتي فلوسك في الأرض.
- بوتي و/ أو قاعدة للتواليت (لو هتعلمي ع التواليت على طول).

5- متصدقيش اللي هيقولك الطفل لو اتعلم ع البوتي هتعيدي معاه من الأول لما تيجي تعلميه ع التواليت.

6- يُفَضَّل الطَلعة الأولانية الطفل يعتكف فيها في البيت عشان متضطريش تلبسيه بامبرز فيتلخبط، واللي يتعلّمه الصبح يتنسي بالليل، وكل يوم يبقى كأنك لسه بتبدئي.
نرجع لتجربتي مع البوتي تريننج، قلعنا البامبرز أن أن أن آآآن..مش هكدب عليكي وأقولك إن مفيش صعوبات، لكنها صعوبات معقولة ومُتوقَّعَة ولا تُقارَن بالتهويل اللي بيتقال. يعني لو هتكلم عن بنتي كمثال، فإحنا من أول يوم بدأنا فيه وهي شبه مُلتزمة في الحضانة، إنما تيجي البيت تلخبط.
الغطلة اللي غلطتها إني كنت مُعتمدة على إن بنتي قبل ما تقلع البامبرز كانت بتقول، لكن الغريب إنها لما قلعته فضلت أول أسبوعين متقولش خالص! وحتى لو سألتها عايزة بوتي تقولي لأ، فبقيت أقعدها تحت شعار "مش يمكن لما تجربي تطلعي عايزة".

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
طلبتكم لا تردوني	انمي	حصري	0	10-12-2014 06:34 AM
دلعي نفسك واشتري التوتي	ساعه	اسواق ستي	0	09-18-2012 07:56 AM
احد اعرف عن التنتد موستورايزرررر	انمي	حصري	0	05-23-2011 04:10 PM
لا تردوني ..	انمي	حصري	0	04-22-2011 03:00 PM
نخيتكم ولا تردوني	انمي	حصري	0	04-06-2011 11:50 PM

اعلاناتي

البوتى تريننج بقى سهل لاى ام

حصري

للمزيد من مواضيعي