@ الجريش بجدر الضغط من مطبخي حياكم @@

04-26-2011, 11:10 AM

قرأت الكثير من الأستفسارات عن طريقة الجريش بجدر الضغط

هذه طريقتي وان شاء الله تعجبكم

بس للأسف حاليا ما عندي صورة لها
اصورها لكم قريبا وانزلها ان شاء الله

الكمية حسب عدد الأشخاص
كميتي تكفي عايلة 4-5 اشخاص كطبق مساعد على السفرة
لأن عادة اسوي في شهر الخير رمضان

المقادير :

قلاص ونص جريش اماراتي او كويتي

بصل

فص ثوم مدقوق + شوية زنجبيل مطحون جاهز ( تحصلونه بغراش برف الأجار بالجمعية )

قطعتين لحم هبر بدون عظم

بهارات لحم

كمون

3 حبات ماجي

شوية زيت

2 طماط مقطع وسط

شوية دارسين ناعم

هيل ناعم

معجون طماط ( حسب الرغبة انا عادة ما اضيف الا بناءا على رغبة الأهل اذا يبونه لونه احمر )

شوية ملح ليمون

شوية فلفل اسود

الطريقة :

- غسلي الجريس ونقعيه 5 -10 دقايق ثم يصفى بالمشخال) لا تكثرين الغسل عشان ما يطلع كل النشا اللي فيه
هذه صورته بعد الغسل

- تغسلين اللحم عدل وتحطينه بماي يغطيه شوي على النار لما يفوح وتطلع الرغوة منه لمدة 7-10 دقايق بس

- تغسلين اللحم من الماي الزفر وتتركينه على جنب

- ضعي في قدر اخر بصلتين شرايح وحمسيهم عدل وضيفي عليهم قطع اللحم وشويه زيت

- ضيفي عليهم بهاراتك الخاصة باللحم + الهيل + شوية كركم + فص ثوم مدقوق والزنجبيل + كمون + الفلفل الأسود وحمسي لما تطلع الريحة ثم ضيفي الطماط المقطع وحمسي لما يصير طري شوي

- جهزي جدر الضغط وضعي محتويات القدر السابق اللي فيه خليط اللحم + الجريش المنقع سابقا والمصفي من الماء

- اضيفي عليهم ماء حتى يصل الى العلامة الموجودة بجدرالضغط من داخل ( يعني الماي ما يزيد عن هالعلامة لأن مع الطبخ راح يطلع من الأجناب وهذا موزين مع جدر الطبخ )

- اغلقي الجدر جيدا واتركيه على نار متوسطة لمدة نصف ساعة

- بعد النص ساعة واطفاء النار دعي جدر الضغط يبرد شوي لمدة ربع ساعة
حتى يخف البخار داخلة وان فتحتيه مباشرة بينفجر بويهك ( اسم الله عليك ) :eh_s(16):

وافتحيه شوي شوي حبة حبة

- بتشوفين اللحم والجريش استوي ما شاء الله بسرعة

- افرغي الخليط بجدر ثاني واطحني جزء منه بالخلاط او باستخدام المضرابة الكهربائية

( انا احبه نص حبته كبير ونص مطحون واخلطهم مع بعض )

- اضيفي عليهم حبات الماجي + نتفة ملح ليمون حق الحموضة + المعجون ( حسب رغبتك بزيادة اللون الأحمر ) وضبطي الملح .

- اتركيه على النار لمدة ربع ساعة واستمتعي بالطعم بعد ذلك .

التزيين :

3 بصلات قطعيهم صغار ناعم
لومي اسود مطحون
شوية سماق

زيت او سمن او دهن عداني

الطريقة :

قطعي البصل وغسليه ثم ضيفي عليه السماق واللومي الناعم

ضعي الجريش في صحن كبير او بايركس وضعي القليل من الزيت الحار ( سخنيه شوي ) على الوجه ثم وزعي خليط البصل على كل الصحن بالوسط

وعلينا وعليكم بالعافية
اختكم /أحلى همبه كويتية

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تعالي اخذي حق مطبخج مني	انمي	حصري	0	04-08-2011 02:10 PM
الي يحب الجريش يتفضل على الجربش المنهنه	انمي	حصري	0	03-28-2011 09:27 AM
طريقة الجريش	انمي	حصري	0	03-27-2011 11:51 PM
مطبخي	انمي	حصري	0	03-24-2011 10:46 AM
كل عام وأنتم بخير	مملكة نسايم	المملكة العــــامة	6	01-07-2008 02:44 AM

اعلاناتي

@ الجريش بجدر الضغط من مطبخي حياكم @@

حصري

للمزيد من مواضيعي